Собранието денеска ќе ги продолжи седниците 121 и 125, а ќе ја започне и 126. седница, на чиј дневен ред се повеќе законски решенија, национални програми и одлуки од областа на државната ревизија, безбедноста и институционалното функционирање.
На продолжението на 121. седница пратениците ќе го разгледуваат Годишниот извештај на Агенцијата за заштита на правото на слободен пристап до информациите од јавен карактер за 2025 година.
Во рамки на 125. седница, меѓу точките на дневниот ред се измените на Законот за административни службеници, кои ќе се разгледуваат по скратена постапка, како и измените на Законот за надворешни работи во прво читање. Пред пратениците ќе се најдат и предлог-националните програми за високото образование и за научноистражувачката дејност за периодот од 2025 до 2030 година, со предложените мерки.
На новата, 126. седница, пратениците ќе расправаат и за продолжување на рокот за постоење кризна состојба поради можни нарушувања во снабдувањето со нафта и нафтени деривати во земјава.
Меѓу останатите точки се и Дополнетиот предлог-закон за државната ревизија во трето читање, одлуката за испраќање припадници на Армијата на Република Северна Македонија во меѓународната операција на Европската Унија „АЛТЕА“ во Босна и Херцеговина, како и предлог-законот за ратификација на Третиот протокол кон Општиот договор за привилегии и имунитети на Советот на Европа.
На дневен ред се и избор на надворешен член на Комисијата за хартии од вредност и именување претседател и членови на Одборот за доделување на државната награда „Гоце Делчев“.