Почина бугарскиот оперски пејач Николај Иванов, потврдија неговите пријатели. Тој починал само 40 дена по загубата на сопругата, оставајќи зад себе двајца малолетни синови, кои за многу краток период останале без двајцата родители. За оваа незамислива семејна трагедија на социјалните мрежи објави неговиот пријател Васко Мавриков, нагласувајќи дека децата останале сами во годините кога нивната мајка и татко им биле најпотребни.
Пријателите и блиските веднаш покренале хуманитарна акција за собирање донации, со желба да им подадат рака на помош и да им обезбедат поддршка на момчињата, кои се соочуваат со ненадоместлива животна загуба.
Тажната вест на Фејсбук ја објави Васко Мавриков:
„Со голема тага дознаваме дека оперскиот пејач Николај Иванов починал – само 40 дена по загубата на сопругата. Две деца остануваат без родители во моментот кога им се најпотребни.
Организираме акција за собирање донации со која сакаме да им помогнеме на неговите двајца синови и да им дадеме поддршка во овој исклучително тежок период.
Ве молам, ако го познававте Николај или неговото семејство, или едноставно имате можност да помогнете, приклучете се кон оваа акција. Секоја донација, без разлика на нејзината големина, е знак на емпатија и поддршка.
А понекогаш токму поддршката од луѓето е она што може да даде надеж во најтешките моменти“, напиша тој.