Владата денеска го усвои Ребалансот на Буџетот за 2026 година, кој според министерката за финансии, Гордана Димитриеска Кочоска, ќе овозможи продолжување на економскиот раст и забрзување на инфраструктурниот развој во државата.
Ребалансот претставува баланс помеѓу фискалната одговорност, потребата од забрзан развој и сериозен фокус на капиталните инвестиции.
Со овој Ребаланс на Буџетот, вкупните приходи се ревидираат на ниво од 379,2 милијарди денари, што претставува зголемување за околу 4,2 милијарди денари или за 1,1 проценти во однос на иницијалниот Буџет за 2026 година, истакна министерката.
На приходната страна, даночните приходи се проектирани на 213,2 милијарди денари, што е минимално намалување од 0,4 проценти.
Ова намалување е резултат на ревидираните приходи од акцизи и корекција во ДДВ. Приходите од акцизи од првично проектираните 35,8 милијарди денари се ревидираат на 34,2 милијарди денари, односно се намалуваат за околу 1,5 милијарди денари. Причината е јасна – Владата донесе одлуки за намалување на акцизите на нафтените деривати со цел да ги ублажи последиците од растот на светските цени на горивата и да им помогне на граѓаните и компаниите полесно да се справат со ценовните притисоци, нагласи Димитриеска Кочоска.
Неданочните приходи бележат пораст од 2 милијарди денари, додека донациите се зголемуваат за околу 2,7 милијарди денари, најмногу поради ЕУ фондовите.
Вкупните расходи со ребалансот се ревидираат на 425,2 милијарди денари. Кај стоките и услугите има кратење од 900 милиони денари, а средствата се пренасочуваат за субвенции, социјална помош и ранливи категории.
Овие дополнителни средства ги насочуваме кон јасно утврдени приоритети. Обезбедуваме дополнителни средства за земјоделските субвенции, субвенциите во железничкиот сообраќај, поддршката на спортот, студентскиот и ученичкиот стандард. Oбезбедуваме и дополнителна поддршка за најранливите категории граѓани преку средства за социјални надоместоци, заштитни друштва, народни кујни и мерки за деинституционализација, рече Димитриеска Кочоска.
Буџетскиот дефицит се ревидира на 46,1 милијарди денари, односно 4,1 проценти од БДП, но министерката потенцира дека ова зголемување оди за капитални расходи и проекти како Коридорите 8 и 10-д, пречистителни станици, училишта и градинки.
Тука имаме зголемување за 0,6 процентни поени во однос на иницијалната проекција, со што буџетскиот дефицит се ревидира на 46,1 милијарди денари, односно на 4,1 проценти од БДП. За првпат, ова зголемување на дефицитот е резултат пред сè на повисоките капитални расходи и инвестициите во инфраструктурата. Не зборуваме за дефицит кој финансира тековна потрошувачка, туку за дефицит кој финансира развој, истакна таа.
Дефицитот и отплатата на долгот од 76,4 милијарди денари ќе се финансираат преку домашно и странско задолжување на пазарот на капитал.