Иако цената на суровата нафта на светските берзи трет ден паѓа и Брентот од над 108 долари се спушти кон 103 долари за барел, во понеделник во Македонија сепак може да следува ново поскапување на дизелот. Причината е што во пресметката на Регулаторната комисија не се зема само цената на суровата нафта, туку петдневниот просек на рафинираниот дизел на медитеранската берза, кој неделава остана на исклучително високи нивоа.
На почетокот од неделата европските котации на дизелот достигнаа рекордни вредности поради проблемите со снабдувањето од Блискиот Исток и намалените резерви, а падот започна дури во последните два дена. Тоа значи дека високите цени од понеделник, вторник и среда ќе останат во просекот според кој РКЕ ќе ја прави новата пресметка.
Доколку до крајот на денешното тргување нема поголем пад на рафинираниот дизел, сегашните движења оставаат простор цената во понеделник да порасне за неколку денари. Според моменталните берзански движења, раст е можен, но конечната цена ќе зависи и од курсот на доларот и од денешното затворање на берзите.
Дизелот во моментов се продава по максимална цена од 99 денари за литар. Ценовниот удар го амортизираат владините мерки – ДДВ-то за дизелот е намалено на 10 проценти, а акцизата за четири денари по литар. Овие мерки ќе останат важен фактор и во новата пресметка и спречуваат берзанскиот раст целосно да се прелее врз цените на бензинските пумпи.
Кај бензините притисокот засега е помал, па не се очекува раст од размерот што е можен кај дизелот. Новите максимални цени Регулаторната комисија треба да ги соопшти во понеделник.