Известувачот за Македонија во Европскиот парламент, Томас Вајц, за време на претставувањето на пакетот за проширување пред Комитетот за надворешни работи (AFET), ја повика еврокомесарката Марта Кос да вложи дипломатски напори за надминување на отворените прашања меѓу Скопје и Софија.
Вајц посочи дека пример за решавање на билатералните спорови треба да биде моделот меѓу Хрватска и Црна Гора.
Сакам во позитивна смисла да истакнам како Хрватска и Црна Гора се справуваат со билатералните прашања. Сакам да им се заблагодарам на премиерот Пленковиќ и на премиерот Спајиќ што разговараат меѓусебно, што седнаа на иста маса и што наоѓаат решенија за билатералните прашања. Бидејќи билатералните прашања во никој случај не смее да го попречуваат напредокот во процесот на пристапување, а токму вака треба да се постапува – нагласи Вајц.
Тој оцени дека овој пристап може да се примени и во случајот со Северна Македонија, иако истакна дека уставните измени остануваат дел од обврските на европскиот пат.
Сметам, потенцира Вајц, „дека ова е и одличен пример за тоа како може да се пристапи кон билатералните прашања што бараат дијалог и во други земји, како што е Северна Македонија“. Некои од билатералните прашања сега се на европско ниво, станува збор за вклучување на малцинствата, и во тој поглед треба да се реализираат уставните измени. Но, повторувам, единствениот начин да се излезе од тој ќор-сокак е страните да разговараат меѓусебно, односно владите на Бугарија и на Северна Македонија да седнат и да разговараат. И бидејќи знаеме дека мотивацијата не е секогаш на највисоко ниво, Ве Молам, комесарке, да вложите напори во оваа дипломатска насока – ѝ порача Вајц на Кос.
Претходно, еврокомесарката Марта Кос го презентираше пакетот за проширување за 2026 година за десетте земји кандидати, порачувајќи дека Униската ги охрабрува сите земји брзо да напредуваат. Во врска со македонскиот евроинтегративен процес, Кос потенцираше дека фокусот останува на реформите и уставните обврски.
Европската комисијата ќе продолжи да ја поддржува земјата на својот пат кон ЕУ. Нашата цел останува да го отвориме првиот кластер штом ќе се исполнат условите. Земјата треба да ја исполни својата обврска за завршување на уставните измени како што е наведено во заклучоците на Советот од 18 јули 2022. Сега зависи од Северна Македонија – рече Кос.