Два случаи на семејно насилство биле пријавени во Ресен и гевгелиско, при што полицијата привела двајца мажи осомничени за физичко и агресивно однесување кон членови на нивните семејства.
Во Ресен, 24-годишен маж бил приведен откако на улицата „Славејко Арсов“ физички ја нападнал својата невенчана сопруга. Инцидентот се случил на 8 ноември во попладневните часови, по што полициските службеници го лишиле од слобода.
Друг случај бил регистриран истата вечер во гевгелиско село, каде бил приведен 45-годишен маж. Според пријавата, тој во семејниот дом агресивно се однесувал кон сопругата и нивните малолетни деца.
Мажот бил задржан во Полициската станица во Гевгелија, а за случајот бил известен и јавен обвинител.
Од полицијата информираат дека по целосно документирање на двата настани ќе следуваат соодветни поднесоци.