Македонија ќе го прошири своето дипломатско присуство во Балтичкиот регион со отворање нова амбасада во литванската престолнина Вилнус. По тој повод, министерот за надворешни работи и надворешна трговија, Тимчо Муцунски, денеска ќе престојува во работна посета на Литванија.
Свеченото отворање на македонската амбасада ќе биде централниот настан од посетата, со која, според Министерството за надворешни работи, се очекува да се продлабочат дипломатските и билатералните односи меѓу двете земји, како и соработката со поширокиот Балтички регион.
За време на престојот, Муцунски ќе се сретне со литванскиот министер за надворешни работи, Кештудис Будрис. На средбата ќе се разговара за политичките односи, можностите за зголемување на економската размена и напредокот на Македонија кон членство во Европската Унија.
На дневен ред ќе бидат и актуелните безбедносни прашања, како и соработката во рамките на евроатлантските структури.
Посетата се реализира во период кога Литванија се подготвува да претседава со Советот на Европската Унија во првата половина на 2027 година, што се смета за важен период и за европската агенда на Македонија, особено во однос на процесот на проширување.