Заштитата на работничките права, сузбивањето на сивата економија и подобрувањето на деловниот амбиент за стопанствениците остануваат во фокусот на делувањето на Министерството за економија и труд, истакна министерот Бесар Дурмиши во својата најнова објава на социјалната мрежа Фејсбук.
Повикувајќи се на наодите од последниот Извештај на Европската комисија, министерот нагласи дека се бележи значителен пораст на инспекциските контроли насочени кон откривање на непријавени работници и нерегистрирани бизниси.
„Извештајот на Европската комисија бележи дека инспекциските контроли за откривање непријавени работници и нерегистрирани бизниси се зголемени за над 20 отсто во споредба со 2024 година. Непријавената работа ги остава работниците без заштитата што им следува и создава нелојална конкуренција за компаниите што ги исполнуваат своите обврски. Покрај поедноставувањето на постапките за законско работно ангажирање, ќе продолжиме и со контролите за откривање и санкционирање на прекршувањата. Извештајот укажува и на намалување на јазот во платите меѓу жените и мажите од 14,5 на 12,3 отсто“, напиша министерот Дурмиши.
Од Министерството порачуваат дека институциите и понатаму ќе работат на унапредување на законодавството и поедноставување на процедурите, со цел обезбедување праведни услови на пазарот на труд и заштита на сите чинители во економскиот систем.