Претседателот на Собранието, Африм Гаши, смета дека партиите треба да седнат на разговор за измените на Законот за јавните набавки, за кои се поднесени 2 158 амандмани. Ако нема договор, нагласува тој, Собранието ќе ги разгледа амандманите во роковите предвидени со Деловникот.
-Во овој случај, мислам ако има толку многу амандмани, ние сме парламентарна демократија, Собранието е место каде што се разговара, ќе треба да се најде начин да се дојде до решение – вели Гаши во интервју за „360 степени“ на МРТ 1.
Прашан дали веќе разговарал со координаторите на пратеничките групи, претседателот на Собранието истакна дека денеска, од објективни причини немало координација и оти позициите на партиите се познати.
Измените се прва точка на дневниот ред на утрешната пленарна седница, но на прашањето дали пратениците ќе почнат со нив или предност ќе добие ребалансот на буџетот, Гаши вообичаено кога е во прашање ребалансот се почнува со него.
Во интервјуто Гаши говореше и за тоа дали забелешките од граѓанскиот сектор дека дел од измените ја намалуваат транспарентноста и отвораат простор за корупција се причина пратениците уште еднаш да ги преиспитаат предложените измени на Законот. Според него, суштината на измените е при изборот на најдобрата понуда, покрај цената, да се вреднува и квалитетот.
-Никој нема намера, најмалку мнозинството во овој случај да протне нешто – рече Гаши, додавајќи дека ако дел од одредбите оставаат простор за сомнежите на кои укажува граѓанскиот сектор, за нив треба да се разговара.
Законот утре се враќа на трето читање откако претседателката Гордана Сиљановска-Давкова не го потпиша указот за измените што Собранието ги усвои на 26 октомври.
Тој во интервјуто се осврна и на парламентарните избори и притоа изрази убедување дека ќе се одржат во редовниот термин, иако, според неговата процена, на Влен би му одговарало да се гласа сега. Тој вели дека од евентуални предвремени избори не очекува позначајна промена во односот на силите меѓу ВМРО-ДПМНЕ и СДСМ, но очекува подобар резултат за Влен во однос на ДУИ.
-Но, не мислам заради интересот на една политичка партија треба да се оди на избори и да се поремети овој принцип за кој верувам дека има поголеми ефекти во општеството, во државата, да креираме заеднички политичка стабилност секои четири години – вели претседателот на Собранието.
Гаши вели дека неколку последователни изборни циклуси во кои парламентот би го завршил четиригодишниот мандат би придонеле за политичка стабилност на земјата. Исходот од изборите за градоначалник на Брвеница, каде што во вториот круг кандидатот на ДУИ го победи кандидатот на ВМРО-ДПМНЕ, не му ја сменил таа процена