Пратеничката од Левица, Јована Мојсоска, на денешната прес-конференција алармираше за сериозниот проблем со недостигот на лекот ‘фактор 8’, неопходен за лицата со хемофилија.
„Повеќе од една година лицата со хемофилија живеат во вистинска голгота поради недостигот на лекот ‘фактор 8’. Уште од мај минатата година, кога беше раскинат тендерот за овој лек, пациентите постојано добиваат ограничени количини, далеку под нивните реални потреби“, истакна Мојсоска.
Според информациите доставени до Левица од самите пациенти, едно лице со хемофилија наместо потребните 30.000 единици месечно, добива само 7.000 единици од лекот. Поради ваквите рестрикции, дел од пациентите се принудени да живеат врзани за кревет и се соочуваат со сериозно нарушен квалитет на живот. Мојсоска посочи дека со Институтот за трансфузиона медицина раководи директорот Амир Ељези, кадар на владејачката коалиција, кој повеќе од една година не успева да го обезбеди лекот во потребните количини.
„Уште во јануари, на седница за пратенички прашања, заменик-министерот за здравство Јовица Андовски уверуваше дека лекот ќе биде набавен во доволни количини и дека лицата со хемофилија можат да бидат спокојни. Но, лицата со хемофилија повторно алармираа до Левица дека лекот ‘фактор 8’ го нема во потребните количини.“, нагласи таа.
Од Левица оценуваат дека е недозволиво пациенти да молат за основна терапија од која им зависи здравјето и животот.
„Нечовечно и нехумано е лица да молат за лек во држава која троши милиони на авокадо и аспарагус. Прашањето е кој ќе ја сноси одговорноста доколку кај лицата со хемофилија настапат животно-загрозувачки последици само поради неспособноста на директорот Ељези да го обезбеди потребниот лек ‘Фактор 8’“, порача Мојсоска