ВМРО-ДПМНЕ реагира на синоќешното гостување на лидерот на СДСМ, Венко Филипче, во емисијата „Само интервју“ на Канал 5, обвинувајќи го дека со своите изјави го омаловажил образованието во земјава и го довел во прашање знаењето на македонските студенти.
„Чиракот на Заев, Венко Филипче, сакајќи да го омаловажи образованието во државата и да посочи дека нашите студенти се многу послаби од странските, призна дека неговите ученици, патем идни доктори, имаат катастрофално знаење“, се наведува во реакцијата на ВМРО-ДПМНЕ.
Од партијата велат дека со тоа, како што оценуваат, Филипче потврдил дека како професор не успева да им го пренесе потребното знаење на студентите.
Во реакцијата се поставува и прашањето за неговиот професорски ангажман, при што од ВМРО-ДПМНЕ велат дека очекуваат новите измени во Законот за високо образование да го задржат неговиот статус на професор.
Партијата упатува и критики поврзани со неговото работење во здравствениот сектор, при што наведува низа обвинувања за вакцини, јавни набавки и модуларните болници.
Од ВМРО-ДПМНЕ, истовремено, го споредуваат Филипче со премиерот и професор Христијан Мицкоски, за кого наведуваат дека добивал признанија од студентите и е меѓу почитуваните професори во својата професија.