Средба со јасна европска порака – Владата останува целосно посветена на евроинтеграциите и на спроведувањето на реформите што ќе ја направат државата посилна и поправедна, порача премиерот Христијан Мицкоски на заедничката прес-конференција со амбасадорот на Европската унија, Михалис Рокас, по примопредавањето на Извештајот за напредокот на земјава.
„Владата останува 100 проценти усогласена со заедничката надворешна и безбедносна политика на Европската унија, што претставува важна придобивка за карактерот на нашите меѓусебни односи и за нивото на нашата посветеност кон европските вредности. Како Влада остануваме целосно посветени на европскиот пат и на реформите кои ја прават државата посилна, пофункционална и поправедна. Ќе ги адресираме сите области каде е забележан застој со конкретни мерки и отчетност. Нашата цел е полноправно членство во рамки на ЕУ,“ изјави премиерот Мицкоски.
Тој нагласи дека Извештајот на Европската комисија не претставува оценка за една година или една Влада, туку за континуитетот на реформските процеси, институционалната зрелост и одговорот на земјата на европските приоритети.
„Во Извештајот се нотира дека во некои области постои одреден или ограничен напредок, нема области со назадување, а во четири поглавја е забележан добар напредок. Во делот на слободното движење на капиталот дури и е зголемено нивото на подготовка благодарение на приклучувањето кон СЕПА и спроведувањето на мерките против перење пари и финансирање тероризам. Комисијата ги поздравува чекорите во делот на економијата, стабилниот банкарски сектор, умерениот раст на БДП и фискалната дисциплина,“ рече премиерот.
Мицкоски посочи дека позитивни оценки има и за дигитализацијата, модернизацијата на јавната администрација, системите за е-набавки и зајакнувањето на сајбер-безбедноста.
„Напредок е забележан и во образованието, науката и младинските политики, преку зголеменото учество во програмите Horizon Europe и COST. Во инфраструктурата се истакнати активностите околу Коридорот VIII и новиот Закон за енергија кој отвора пат кон зелена и праведна транзиција. Европската комисија нотира реален напредок и во медиумската регулатива, особено во зајакнувањето на финансиската независност на Агенцијата за аудио и аудиовизуелни медиумски услуги,“ додаде премиерот.