Европската унија ќе продолжи целосно да ја поддржува Украина на патот кон „праведен и траен мир“, порача претседателката на Европската комисија Урсула фон дер Лајен во Европскиот парламент, на дебатата за ставот на ЕУ кон предложениот мировен план.
Фон дер Лајен истакна дека „Русија верува дека може да ги совлада Украина, Европа и сите нејзини сојузници“, додавајќи дека Москва секогаш ја засилува агресијата кога се прави напредок во преговорите. Таа нагласи дека Европа мора да го задржи притисокот врз Русија додека не се постигне праведен мир.
Според неа, Москва преку секој договор се обидува „трајно да ги прекројува границите“, додека европската цел е да се создадат услови за стабилен мир што нема да „сее семе“ за нови конфликти. Фон дер Лајен зборуваше и за силна безбедносна архитектура за континентот, „поткрепена од силна Европа, силно НАТО и силно трансатлантско партнерство“.
Таа ја поздрави улогата на американскиот претседател Доналд Трамп во обидите да се постигне договор што ќе го сопре насилството, ќе ја гарантира безбедноста на Украина и ќе ја заштити европската безбедност.
Фон дер Лајен ги наведе клучните приоритети на ЕУ:
• постигнување праведен и траен мир со долгорочни безбедносни гаранции;
• „почитување на суверенитетот на Украина“, без менување граници со сила;
• финансирање на Украина за 2026–2027 година преку замрзнатите руски средства;
• принципот „ништо за Украина без Украина“;
• и „враќањето на секое украинско дете киднапирано од Русија“.
„Претстојните денови се полни со опасност… Но верувам дека постои можност за вистински напредок“, рече Фон дер Лајен, потенцирајќи дека Европа мора да остане вклучена во сите напори што водат кон мир.
Во името на Советот на ЕУ, данската министерка за европски прашања Мари Бјере повтори дека Унијата останува единствена во поддршката за Украина. Таа порача дека мирот мора да биде „сеопфатен, праведен и траен“, со цврсти безбедносни гаранции и целосно почитување на украинскиот суверенитет.
„Само притисокот врз Русија и поддршката за Украина ќе им овозможат на Украинците да ја осигураат својата безбедност и слобода“, заклучи Бјере