Новата методологија за пресметка на потрошувачката кошница има за цел да обезбеди објективен, транспарентен и статистички заснован приказ на реалните трошоци на домаќинствата, порача министерот за економија и труд Бесар Дурмиши на денешната седница на Економско-социјалниот совет (ЕСС).
На седницата, социјалните партнери дискутираа за животниот стандард на граѓаните, при што фокусот беше ставен врз просечната потрошувачка кошница изготвена од ресорното министерство.
„Нашата цел не е да покажеме пониска бројка, туку да обезбедиме проверлива, транспарентна и статистички заснована слика за трошоците на домаќинствата. Податоците треба да ни служат како основа за носење одговорни одлуки и мерки што ќе придонесат за подобрување на животниот стандард и заштита на куповната моќ на граѓаните“, нагласи министерот Дурмиши.
Според официјалните податоци, просечната потрошувачка кошница за септември 2026 година изнесува 58.117 денари за четиричлено домаќинство. Ова претставува намалување од 358 денари (0,6%) во споредба со август, додека во однос на јануари годинава вредноста е зголемена за 1.736 денари (3,1%).
Методологијата опфаќа 11 категории на трошоци и 101 прехранбен производ, користејќи податоци од Државниот завод за статистика за осум градови, цени од 23 пазари, како и од пет големи и три регионални трговски синџири. Во однос на разликите со другите пресметки, Дурмиши посочи дека тие произлегуваат од различната структура и опфат.
„Различните пресметки не треба да бидат причина за меѓусебно оспорување, туку поттик за конструктивна дискусија и креирање политики засновани на релевантни податоци. Ниту една статистика не може да ја замени реалната грижа за куповната моќ, економската сигурност и достоинствениот живот на граѓаните“, истакна Дурмиши.
Покрај кошницата, на ЕСС се отворија и прашањата за неработните денови, работата во недела, четиридневната работна недела и пензискиот стаж.
„Економско-социјалниот совет е местото каде што ги слушаме аргументите на синдикатите, работодавачите и институциите. Нашата определба е преку отворен и конструктивен социјален дијалог да доаѓаме до решенија што ќе ги штитат правата на работниците, ќе обезбедат предвидливост за работодавачите и ќе придонесат за подобар животен стандард“, порача министерот Дурмиши.