Претседателот на СДСМ, Венко Филипче, и неговата партија применуваат двојни аршини во врска со „Алта банка“, обвинувајќи денес, додека избегнуваат одговори за одлуките донесени во 2023 година, изјави на прес-конференција портпаролот на ВМРО-ДПМНЕ, Валентин Манасиевски.
Според Манасиевски, за време на претходната власт, токму актуелните пратеници на СДСМ како тогашни членови на Владата одобриле Државното правобранителство да стапи во деловни односи со „Алта банка“ и Давор Мацура.
Портпаролот на ВМРО-ДПМНЕ праша зошто раководството на СДСМ не ја предупредило јавноста во 2023 година доколку поседувало информации за сомнителен капитал и за Давор Мацура, како и кои проверки биле спроведени пред продажбата на акциите и кој ја одобрил таа постапка.
„Денес Филипче и СДС се обидуваат да се претстават како заштитници на граѓаните. Лажните ПР политики не им проаѓаат кај граѓаните“, рече Манасиевски.
Тој оцени дека Филипче не може да упатува обвинувања кон други, а истовремено да молчи за одлуките од времето на владеењето на СДСМ, порачувајќи: „Граѓаните заслужуваат одговор, зошто за Алта банка станаа гласни дури откако престанаа да бидат власт?“.

