Советот на Општина Кратово едногласно ја прифати иницијативата на градоначалникот Тодорче Николовски за доделување еднократна парична помош на сите ученици кои ќе се запишат во прва година средно образование на територијата на општината.
Според донесената одлука, секој ученик кој ќе се запише во прва година гимназиско образование ќе добие финансиска поддршка во износ од 9.000 денари.
За оние пак кои ќе се определат за стручно образование во секторот угостителство и туризам, поточно за профилот хотелско-ресторантски техничар, Општината предвидува еднократна субвенција од 3.000 денари.
„Дополнително, учениците запишани во овој профил како дел од дуалното образование, кои ќе ги исполнат условите, ќе добиваат месечна стипендија од 3.500 денари во текот на девет месеци, обезбедена од Владата и Министерството за образование и наука“, информираат од Општина Кратово.
Од локалната самоуправа нагласуваат дека целта на оваа мерка е да се мотивираат младите да го продолжат своето образование во родниот град, со што директно се поттикнува нивниот професионален развој во сопствената средина.