По повод одбележувањето на 14 Април – Денот на Царинската управа, денеска на градскиот плоштад во Гевгелија, во периодот од 11 до 14 часот, ќе се одржи настанот „Отворен ден со Царинската управа“.
Од Царинската управа информираат дека посетителите ќе имаат можност да се запознаат со задачите на мобилните царински тимови, како и со опремата што ја користат во секојдневната работа.
Програмата предвидува демонстрација на вештините на царинските кучиња, како и презентација на специјализирана опрема, вклучително и скенер за товарни возила што се користи за откривање шверцувана стока.
Целта на настанот е да се доближи работата на Царинската управа до граѓаните и да се подигне свеста за нејзината улога во економскиот развој и безбедноста на државата, посочуваат од институцијата.