На дневен ред на денешната седница на Судот се вкупно девет предмети за дискусија, едно барање за преиспитување на одлука на Уставниот суд и два предлози за донесување конечни одлуки.
Меѓу иницијативите е и онаа на Славко Лазовски со која се оспорува терминот „привремен“ во Законот за таксата за привремен престој, поради наводна несогласеност со современите уставни вредности.
Судот ќе разгледува и иницијативата на Игорчо Точев за оспорување на дел од член 34 став 5 од Законот за минерални суровини, како и одлука за присоединување на компанијата „Боров Дол“ кон „Бучим“, поради наводи за можност за арбитрарно определување на надоместок.
Три иницијативи се поврзани со Законот за прекршоците, поднесени од пратениците Зиадин Села, Илире Даути и Елми Азири, како и од Или Пачуку и политичката партија предводена од Арбен Таравари. Тие тврдат дека новите решенија за електронско евидентирање на сообраќајни прекршоци создаваат нееднаквост, бидејќи системот се применува само во Скопје, Тетово и Куманово.
Дополнително, на седницата ќе се расправа за иницијативи поврзани со Законот за јавните набавки, Законот за забавни игри и игри на среќа, измените на Законот за метрологијата, како и одлука на Општина Центар – Скопје за утврдување висината на нултата плоча кај градби на терени во пад.
Судот ќе разгледува и иницијатива за оценување на член од статутот на Синдикат на работниците од угостителството, туризмот и комунално-станбеното стопанство, поради наводи дека работниците не можат да истапат од синдикатот во период од три години.
На дневен ред е и барањето за преиспитување на одлука на Уставен суд на Република Северна Македонија, поднесено од Вера Апостоловска, во кое се оспорува учеството во гласањето на судијката Елизабета Дуковска.
Конечно, ќе се разгледаат и два предлога за донесување конечни одлуки по предмети каде Судот веќе постапувал за оценување на уставноста на измените на законите за платите на судиите, јавните обвинители и членовите на Советот на јавните обвинители.