Во Општина Гази Баба започнаа градежните активности за изградба на нова детска градинка лоцирана помеѓу населените места Маџари и Керамидница.
Градоначалникот Бобан Стефковски, заедно со министерот за социјална политика, демографија и млади, Ѓоко Велковски, изврши увид на терен во изведбата на овој капитален објект.
Ова е трета нова детска градинка што се гради во општината, а средствата во висина од 147 милиони денари се обезбедени преку вториот владин повик.
Новиот современ објект ќе се простира на површина од 1.360 квадратни метри, организиран на приземје и еден кат, со вкупен капацитет за згрижување на 150 деца.
Во рамки на објектот предвидени се 10 современо опремени занимални, од кои две за јасли и осум за деца од предучилишна возраст, а предвидениот рок за изградба е 18 месеци.
Градоначалникот Стефковски посочува дека градежните работи се одвиваат со засилена динамика:
„Работите се одвиваат со силно темпо и доколку продолжи вака, очекувам овој капитален проект да биде завршен пред договорениот рок. Тоа е доказ дека кога институциите работат координирано, кога постои одговорност и посветеност, резултатите доаѓаат побрзо од очекуваното.“
Тој најави дека наскоро ќе започне изградбата и на четврта нова градинка на подрачјето на општината, која ќе се наоѓа во Сингелиќ.
„Наскоро започнуваме со изградба и на четвртата нова детска градинка во Сингелиќ. Постапката за избор на економски оператор е во завршна фаза и многу брзо ќе започне реализацијата и на овој значаен проект. Нашата цел е јасна – да обезбедиме доволно места за секое дете, да ги намалиме листите на чекање и да им дадеме вистинска поддршка на младите родители“, истакна Стефковски.
Првиот човек на општината порача дека фокусот на локалната власт останува насочен кон реализација на инфраструктурни и социјални проекти.
„Делата се најсилниот аргумент. Резултатите се најдобриот одговор, а довербата на граѓаните се оправдува единствено со чесна, одговорна и посветена работа. Продолжуваме. Со визија! Со дела! Со уште посилно темпо! Да им служиме на граѓаните!“, порача тој.