Повеќе од еден милион луѓе излегоа денеска на улиците во над 40 италијански градови во рамки на националниот штрајк организиран од синдикатите. Граѓаните го изразија своето незадоволство од високите трошоци за живот, состојбите во здравството и образованието, како и од алокацијата на буџетски средства за вооружување.
Најжестоки судири беа забележани во Рим и Торино, каде што беа уапсени осум лица, а повеќе демонстранти и полицајци се здобија со повреди. Во главниот град, каде што се собраа над 100.000 учесници, полицијата употреби водени топови откако дел од демонстрантите фрлаа шишиња, петарди, камења и молотови коктели.
Ескалација на насилеството во Рим се случи во близина на Виа Клаудија и пред Министерството за образование. Демонстрантите во главниот град најавија дека ќе подигнат камп во близина на Колосеумот, кој ќе трае во следните три дена.
„Ќе кампуваме до следната седница на парламентот“, порачаа демонстрантите на чело на колоната, скандирајќи ги паролите „Положете го оружјето, зголемете ги платите“ и „Имаме два месеци да се бориме против високите трошоци и буџети“.
Во Торино, толпата се судирaше со полициските кордони пред зградата на префектурата, при што врз полицијата беа фрлани јајца, водни бомби и шишиња, по што полициските сили повторно интервенираа со водени топови.
„Уморни сме од овој живот, од тоа што повеќе не можеме да купиме храна или гориво, од колапсот на здравствениот систем, од училиштата што се распаѓаат и универзитетите каде што несигурноста на работното место е катастрофална, и пред сето ова, одговорот на владата е ништо“, скандираа учесниците во Торино преку мегафони.
Тие порачаа дека ќе продолжат со собирите секоја сабота. „Не сме уморни и нема да се умориме. Денес, како и во следните неколку саботи, мора да станеме побројни, сè додека не ги блокираме сите артерии во оваа земја“, извикуваа демонстрантите.
Протестни маршеви и блокади беа забележани и во Милано, каде што излегоа околу 25.000 луѓе, а обиколницата беше блокирана повеќе од три часа. Собири се одржаа и во Неапол, Џенова и Палермо. Според информациите на ADN Kronos, на протестите беа отпеани песната „Bella Ciao“ и паролите „Илјадници од нас се на улиците, ги враќаме нашите градови“, „Да се организираме и да запреме сè“ и „Сите сме антифашисти“.