Ние сакаме преку вас до граѓаните да соопштиме една многу важна вест. Таа е поврзана со она што го слушнавме од министерот за надворешни работи, Тимчо Муцунски, дека постои, цитирам, таен договор за започнување на преговори со Европската Унија. Денеска оваа прес-конференција е посветена токму на тоа, односно да го разоткриеме, како опозиција, тој план. Почитувани граѓани, се подготвува терен за прифаќање на францускиот предлог, се вели во соопштението на СДСМ од денешната прес-конференција на Андреј Жерновски.
„Нашите информации од Брисел се дека Владата на Мицкоски тоа веќе го договорила. Тоа се сигнали кои пристигнуваат и од Брисел, и од Берлин, и од Париз“, изјавија од СДСМ.
Од партијата велат дека се исцрпени сите претходни обиди и пораки од Владата, кои, според нив, биле претставувани како можни решенија за евроинтегративниот процес.
„Се почна со одложено дејство, потоа со специјални услови, па со најави за посебни договори. Најново беше тврдењето дека Македонија би можела да влезе во Европската Унија без право на глас. Сето тоа падна во вода“, посочија од СДСМ.
Според нив, сега Владата се обидува претходните позиции да ги претстави како политичка победа.
„Единственото нешто што го прават е да најдат начин она што до вчера го нарекуваа лага и велепредавство да го претстават како успех“, велат од СДСМ.
Од опозициската партија се осврнаа и на изјавите на владини претставници поврзани со Преспанскиот договор, јазикот, идентитетот и НАТО, оценувајќи дека има промена во ставовите во однос на периодот кога ВМРО-ДПМНЕ била во опозиција.
„Се сведочи на нагол пресврт во политиката и дипломатијата на Владата. Денеска се признаваат работи кои претходно беа предмет на напади кон тогашната власт“, наведоа од СДСМ.
Од партијата порачаа дека, според нив, граѓаните наскоро ќе видат дека политиките на СДСМ биле насочени кон европската интеграција и иднината на државата.
„Доаѓа период кога ќе стане јасно кој ја зборувал вистината и кој носел одлуки за добробит на граѓаните и идните генерации“, порачаа од СДСМ.