Неколку членови на криминална група се уапсени во Нови Сад под сомнение дека подготвувале насилни инциденти и немири во Белград за време на изборната ноќ на 25 октомври.
Според неофицијалните информации што ги пренесува „Блиц“, групата била предводена од 28-годишен маж осомничен за трговија со дрога. Тој наводно регрутирал лица и набавувал оружје и опрема со цел извршување насилство врз полицијата и политичките неистомисленици.
Истражните органи се сомневаат дека предводникот на групата планирал да пристигне во главниот град на Србија со околу 80 лица.
Според извори на српскиот медиум, планот предвидувал насилства во градот.
„Ќе бидат запалени автомобили, ќе бидат фатени „цачии“, ќе им бидат одземени пари, ќе бидат фрлани молотови коктели од скутери и ќе бидат создадени сериозни немири“, наведува изворот на „Блиц“.
Осомничениот исто така најавувал дека неговиот тим ќе биде распореден на повеќе локации во „целосна воена опрема“, снабден со соодветни реквизити за насилство.
Тој посочил дека групата, опремена со столбови, балаклави, факели и ножеви, ќе престојува во станови и скривалишта со 15 до 20 автомобили.
Според наводите, тој истакнал „дека на повик на оние што стојат зад Студентскиот список, ќе стапат во акција“, порачувајќи: „Ќе се втурнеме, ќе исчистиме сè“.
Изворот на медиумот додава дека организаторот во повеќе наврати најавувал и можна ескалација на судирите.
Во неколку разговори, тој рекол дека ќе има крвопролевање и дека ќе има смртни случаи во судирите – вели изворот на „Блиц“.