Основното јавно обвинителство во Кочани поведе постапки против девет лица за сомневања за поткуп, злоупотреба на службена положба, оддавање службена тајна и фалсификување службени документи, поврзани со даночните контроли во дискотеката „Пулс“ и други фирми.
Против три лица е поднесен обвинителен акт, додека за шест е поднесен обвинителен предлог, информираат од Јавното обвинителство.
Според обвинението, двајца даночни контролори примиле очила и рачен часовник од лице кое било одговорно во повеќе фирми, во замена за информации за ненајавени контроли на Управата за јавни приходи и МВР.
Еден од контролорите, според обвинителството, преку пораки на Вибер му откривал информации за активностите на институциите. При контрола на 6 март 2024 година, двајцата контролори утврдиле даночни неправилности и нерегистриран промет, но не ги внесле во записникот. Со тоа, како што наведува обвинителството, на буџетот му била нанесена штета од 98.400 денари поради ненаплатена глоба. Вториот контролор е обвинет и за фалсификување службен извештај.
Обвинителен предлог е поднесен и против четворица даночни контролори и инспектори, како и против вработена во Државниот пазарен инспекторат. Според обвинителството, тие не евидентирале утврдени неправилности при контролите на фирми поврзани со реален сопственик кој е татко на лицето обвинето за давање поткуп. Дел од извештаите, според наводите, биле фалсификувани, поради што не биле наплатени законските глоби.
Во случајот е опфатен и реалниот сопственик на фирмите, кој, според обвинителството, им помогнал на инспекторите во дејствијата за кои се товарат.
Од Обвинителството информираат дека во рамки на истата кривична пријава постапката за две лица е запрена поради застареност, додека за други две е утврдено дека нема основи за гонење за наведеното или друго кривично дело што се гони по службена должност.