Захариева: Стратегијата на ЕУ за Западен Балкан е инспиративна, праведна и реална
Стратегијата за проширување на ЕУ кон Западен Балкан е многу навремена, изјави бугарската вицепремиерка и министерка за надворешни работи Екатерина Захариева која учествуваше на дискусијата „Иднината на Западен Балкан и новата стратегија за проширување на ЕУ“ што денеска се одржа во Домот на Европа во Софија.
- Во стратегијата гледаме многу позитивни страни, рече Захариева.
Таа оцени дека Стратегијата е навремена, сеопфатна и инспиративна. Според неа, Стратегијата е многу праведен документ, бидејќи јасно ги истакнува предизвиците пред секоја од државите.
- Тоа е еден долгорочен документ, тој дава доста амбициозен датум - 2025 година, истакна таа и додаде дека во исто време стратегијата многу јасно кажува дека нема да има компромиси со критериумите.
- Документот е стимулирачки, инспиративен, но исто така и реален, јасно кажува кои се предизвиците и што треба да се случи, изјави Захариева.
Посочувањето на индикативен датум може да биде поттик, смета Захариева и Стратегијата ја нарече отворен и чесен документ.
Таа изрази задоволство што Стратегијата исто така се фокусира на младите луѓе, на создавањето работни места, на создавањето претприемачки и дигитални вештини.
Захариева истакна дека европската перспектива на Западен Балкан значи безбедност, стабилност и просперитет на цела ЕУ.
Министерката исто така, коментираше дека постојат два вида замор - заморот од проширувањето меѓу голем број граѓани и политички елити на земјите-членки на ЕУ, што може да се должи на многуте проблеми со кои се соочува ЕУ во последниве години и заморот од реформите и омаловажување на некои од земјите-кандидати.
Таа истакна дека Бугарија ја поставила многу високо, како еден од основните приоритети на своето претседателство, европската перспектива и поврзаноста на Западен Балкан и изрази убеденост, дека тој фокус врз Западен Балкан нема да заврши со шесте месеци на бугарското претседателство.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа