Две можни сценарија за Алта банка – да се најде нов сопственик кој ќе ја консолидира банката или таа да замине во стечај. Премиерот Христијан Мицкоски уверува дека и во најлошото сценарио сите штедачи и доверители ќе бидат целосно обесштетени, а за евентуалните проблеми со продажбата ја обвини опозициската СДСМ.
Според Мицкоски, обезбедувањето нов купувач ќе биде тешко бидејќи, како што тврди, опозицијата со своите настапи ги одвраќа потенцијалните инвеститори заинтересирани за преземање и консолидација на банката.
„Можни се две сценарија. Првото е да се обезбеди купувач, што ќе биде многу тешко. Гледате што прават, држат прес-конференции пред Народната банка и ги одвраќаат потенцијалните купувачи. Второто сценарио е, ако нема купувач, банката да влезе во стечај“, изјави Мицкоски.
Премиерот повика на смиреност, посочувајќи дека според владините проверки, меѓу 95 и 96 проценти од штедачите имаат влогови до 30.000 евра, кои се целосно осигурени преку Фондот за осигурување депозити.
За останатите штедачи и доверители, чии побарувања би влегле во стечајната маса, Мицкоски тврди дека нема причина за загриженост бидејќи вредноста на активата на банката е значително поголема од нејзините обврски.
„Активата на банката е многу поголема отколку што се побарувањата од истата, можеби два-три пати поголема. Државата има инструменти и го следи процесот. Нема да остане ниту еден штедач или компанија кои нема да бидат обесштетени до последниот цент“, порача премиерот.
Мицкоски ги обвини СДСМ дека со ширење паника и шпекулации дополнително ја усложнуваат состојбата, повикувајќи ги граѓаните да не подлегнуваат на политичките обвинувања.
Алта банка Битола од 1 ноември е под тримесечна привремена администрација на Народната банка, по проблемите со нејзиниот сопственик во Србија. Банката продолжува со работа, но со ограничувања за повлекување и префрлање средства од сметките на клиентите.