Линеарното зголемување на пензиите е мерка за усогласување со животниот стандард бидејќи цените на пазарот се подеднакво зголемени за сите граѓани, изјави директорот на Фондот за ПИОМ, Никола Мемов.
Во интервју за Радио Слободна Европа, тој појасни дека согласно законските измени, во март пензионерите ќе добијат уште едно линеарно покачување од 1.000 денари. Сепак, овој модел е привремен.
Според Мемов, веќе од септември планирано е враќање на старите законски одредби, со што пензиите повторно ќе се усогласуваат процентуално, според таканаречениот „швајцарски модел“.
Директорот се осврна и на иницијативите поднесени до Уставниот суд во врска со начинот на пресметка.
„Има две иницијативи од граѓани доставено до Уставниот суд и ќе видиме сега. Одлуката е пред донесување, односно трае јавната расправа околу ова значајно прашање во општеството. Сакам да истакнам дека измената на Законот за пензиско инвалидско осигурување беше донесена минатата година, на барање на пензионерите се донесе оваа одлука усогласувањето на пензиите со швајцарскиот модел – процентуално се замени со линеарно зголемување на пензиите односно линеарно усогласување на пензиите на сите 345.000 пензионери“, вели Мемов.
Тој децидно отфрли какви било шпекулации за зголемување на старосната граница за пензионирање, уверувајќи дека такво нешто не се размислува.