Институтот за демократија „Социетас Цивилис“ – Скопје и фондацијата „Конрад Аденауер“ денеска организираат панел-дискусија посветена на стратешките односи меѓу Европската Унија и Северна Македонија во услови на променета геополитичка реалност.
Настанот, насловен „Стратешка поврзаност за стабилност: ЕУ и Северна Македонија во новата геополитичка реалност“, ќе започне со поздравни обраќања на Даниел Браун, претставник на фондацијата „Конрад Аденауер“, и Марко Трошановски, претседател на Институтот за демократија „Социетас Цивилис“ – Скопје.
На панелот ќе учествуваат вицепремиерот и министер за транспорт Александар Николоски, германската амбасадорка Петра Дрекслер, евроамбасадорот Михалис Рокас, Флориан К. Фајерабенд, заменик-раководител на одделот Европа/Северна Америка при фондацијата „Конрад Аденауер“, како и професорот Иван Дамјановски од Правниот факултет „Јустинијан Први“ во Скопје.
Дискусијата ќе биде насочена кон улогата на соработката меѓу ЕУ и Северна Македонија во зајакнувањето на стабилноста, отпорноста и развојот на земјата и регионот, во услови на актуелните геополитички предизвици и промени во европската безбедносна архитектура.
Посебен акцент ќе биде ставен на политичките, економските и инфраструктурните аспекти на европската интеграција и нивното значење за Северна Македонија во контекст на актуелните меѓународни случувања, најавуваат организаторите.