Посветено за Скопје – нов кружен тек кај НБРМ и две монтажни катни гаражи, соопшти Градоначалникот на Град Скопје Орце Ѓорѓиевски.
Денес, на седницата на Советот на Град Скопје беше усвоен ребалансот на Буџетот со кој средствата се зголемуваат за дополнителни 166 милиони денари, средства што директно ги враќаме кај граѓаните преку нови капитални инвестиции за нашиот град, истакна Ѓорѓиевски.
„Особено е важно што ова зголемување не е резултат на нови задолжувања, како што тоа често било пракса во минатото.
Напротив, ова е пример како со домаќинско и одговорно работење, со дисциплина и посветеност, се создава простор за повеќе инвестиции и повеќе проекти кои директно го подобруваат животот на скопјани.
Со овој ребаланс започнуваме со изградба на нов кружен тек кај Народна банка на Република Македонија – ново сообраќајно решение кое ќе донесе ред и проточност на едно од најоптоварените сообраќајни места во градот и ќе го намали секојдневниот метеж со кој се соочуваат илјадници граѓани.
Истовремено започнуваме и со изградба на две нови монтажни катни гаражи во рамки на Клинички центар „Мајка Тереза“, посочи Ѓорѓиевски.
Градоначалникот рече дека со капацитет од околу 500 паркинг места и инвестиција вредна околу 3 милиони евра, конечно се става крај на долгогодишниот проблем со паркирањето во клиничкиот комплекс кој што со години создаваше нервоза, неизвесност и непотребен стрес за пациентите и нивните семејства.
„Ова е олеснување за луѓето кои доаѓаат по здравје, за здравствените работници кои секојдневно се борат за животите на пациентите, но и за студентите по медицина, нашите идни лекари кои токму тука ја градат својата професионална иднина.
Особено е важно што Град Скопје ќе биде институцијата која ќе ги проектира, ќе ги изведува и ќе управува со овие гаражи.
Тоа значи дека граѓаните ќе бидат заштитени од дополнителни поскапувања на цените за паркинг, нешто што често се случува кога вакви капацитети се препуштаат на приватни компании.
Со овој ребаланс вложуваме и во образованието, затоа што иднината на Скопје почнува токму во училишните клупи.
Инвестираме во топлотни пумпи, со што повеќе нема да има училиште во рамки на Град Скопје кое ќе се грее на нафта.
Тоа е голем чекор напред кон почист воздух и поздрава животна средина за нашите деца.
Дополнително поставуваме фотоволтаици, вложуваме во санација на училишните дворови и поставување нова урбана опрема, создавајќи подобри, побезбедни и помодерни услови за младите генерации.
Почитувани скопјани,
кај мене зборот е збор.
Нема импровизации, нема празни ветувања и големи флоскули.
Има работа и само работа.
Тоа е единствениот пат по кој се гради град.
Верувам дека пред Скопје е убава иднина.
Иднина во која сите ќе живееме подобро, во град кој ќе биде модерен, достоинствен и горд, град кој ќе биде дом по мерка на сите нас.
Продолжуваме уште посилно, уште поодлучно и со уште поголема љубов кон Скопје“, потенцираше Ѓорѓиевски.