Хрватскиот портал „tportal“ објави туристички водич за Скопје, во кој ги издвојува најпознатите знаменитости, културно-историските локалитети, природните убавини и гастрономските специјалитети на македонската престолнина, препорачувајќи ја како интересна дестинација за кратко патување или викенд-посета.
Во текстот насловен „Викенд во Скопје: Што сè да видите и вкусите во македонската престолнина“, градот е претставен како место во кое се преплетуваат различни историски периоди, архитектонски стилови и традиции, а посетителите имаат можност да запознаат поинаква култура и начин на живот.
Меѓу локациите што хрватскиот медиум им ги препорачува на туристите се Камениот мост, плоштадот „Македонија“, споменикот „Воин на коњ“, Старата чаршија, Скопското Кале и кањонот Матка.
Посебно внимание е посветено на Старата чаршија, која е опишана како една од најголемите и најдобро зачуваните отомански трговски четврти на Балканот. Авторите ги издвојуваат тесните калдрмисани улички, златарските дуќани, старите занаетчиски работилници, чајџилниците и историските амами, кои денес имаат различни културни намени. Како дел од доживувањето, се препорачуваат турско кафе и традиционална баклава, по што следува прошетка до тврдината Кале, од каде се отвора панорамски поглед кон градот и Водно.
Во туристичкиот водич посебно место има и Дебар Маало, кое е претставено како гастрономски и боемски центар на Скопје, каде најдобро може да се почувствува локалната атмосфера. Хрватскиот портал ги споменува традиционалните кафеани, живата староградска музика и долгите дружења околу трпезата.
Од македонските специјалитети, на странските посетители им се препорачуваат ајвар, пинџур, гравче-тавче, шопска салата и скопски ќебапи, а како придружба се споменуваат домашната лозова ракија и локалното вино вранец.
За оние кои сакаат да избегаат од градската гужва, „tportal“ го издвојува кањонот Матка, оддалечен околу половина час возење од центарот на Скопје. Како активности се наведуваат возење со кајак, пловидба со чамец до пештерата Врело и разгледување на природниот пејзаж со високите варовнички карпи и средновековните манастири.
Меѓу знаменитостите што вреди да се посетат е вклучена и Спомен-куќата на Мајка Тереза, за која порталот потсетува дека познатата нобеловка е родена во Скопје во 1910 година. За крај на денот се препорачува посета на Водно и искачување со жичарницата до Милениумскиот крст, од каде се нуди поглед на скопската котлина.
Текстот е споделен и на официјалната Фејсбук-страница на хрватскиот портал, каде Скопје е предложено како избор за оние кои бараат интересна дестинација за кратко патување без да мора да одат далеку. Во објавата се потенцираат знаменитостите, живописните улици, македонската кујна и богатото културно наследство на градот.
Објавата предизвика позитивни реакции, а читателите во коментарите предложија и други места што туристите би можеле да ги посетат. Меѓу нив се комплексот „Македонско село“, Градскиот парк, паркот во Сарај и Музејот на Македонија.