Од денеска, 9 ноември, почнува примената на новите правила во денарскиот платен промет, со кои се менуваат уплатниците, шифрите за плаќање и начинот на означување на банкарските сметки. Промените се дел од модернизацијата на платниот систем и неговото усогласување со меѓународните стандарди.
Досегашните платни налози ПП10, ПП30, ПП40, ПП50 и ПП53 се заменуваат со нови обрасци со поинаков изглед и ознаки. Така, за уплата на готовина наместо ПП10 ќе се користи ознаката ВГ, за подигнување готовина ПГ наместо ПП40, додека за пренос на пари во денари наместо ПП30 ќе се користи КТД.
Се менуваат и шифрите за целта на плаќањето. Наместо досегашните нумерички ознаки, се воведуваат шифри составени од четири знаци, односно букви или комбинација од букви и броеви. На пример, досегашната шифра 262 за други неспоменати плаќања на правни субјекти се заменува со ознаката NOWS.
Новина е и користењето на банкарските сметки во меѓународниот ИБАН-формат, со додавање на ознаката МК07 пред постојниот број на сметката. Граѓаните нема потреба да отвораат нови сметки, ниту да ги менуваат постојните, бидејќи банките автоматски ќе ги направат потребните приспособувања.
Промените ќе бидат вградени и во електронското и мобилното банкарство, а за граѓаните начинот на извршување на секојдневните плаќања во најголем дел останува ист.