Ива Михаилова од Кочани гостуваше во подкастот на бугарскиот новинар Мартин Карбовски, каде зборуваше за својот национален идентитет, судскиот процес што се води против неа во Македонија и односот на македонските институции кон неа.
Подкастот, објавен на 7 ноември, е насловен „Сакаа да се откажам од бугарското во мене“, а Михаилова во разговорот со Карбовски, во кој учествува и нејзиниот адвокат Николај Димитров, ја претставува својата приказна низ призмата на бугарскиот идентитет.
Таа вели дека се чувствува како Бугарка, иако е родена во Македонија, и тврди дека наводно се соочила со притисоци поради јавното декларирање на својата национална припадност.
Во разговорот Михаилова изнесе и сериозни обвинувања за постапувањето на македонското обвинителство. Таа тврди дека преку посредник ѝ биле побарани пари за да добие условна пресуда, а обвинителот кој го водел предметот го нарече „бугарофоб“. За овие наводи засега нема независна потврда.
Инаку, против Михаилова во Македонија се води судска постапка за сообраќајната несреќа во која загина 33-годишниот Бесим Дурмиши од Љуботен. Таа ја оспорува вината и изнесува сопствена верзија за околностите во кои се случила несреќата.
Нејзиното гостување во бугарскиот подкаст повторно го отвори и прашањето за начинот на кој таа го претставува својот случај пред бугарската јавност, поврзувајќи го судскиот процес со својата национална определба.