Бензините имаат простор за ново благо поевтинување, но дизелот од вторник може повторно да поскапи и покрај падот на берзанските котации. Пресметката врз основа на досегашните движења на референтниот медитерански пазар покажува дека во понеделник РКЕ би можела да ја намали цената на ЕУРОСУПЕР БС-95 за околу половина до еден денар, додека кај дизелот клучно ќе биде дали Владата ќе го продолжи намалениот ДДВ од 10 проценти.
РКЕ секој понеделник ги пресметува максималните цени според просечните дневни котации на рафинираните деривати од Platts European Marketscan за претходниот седумдневен период. Во пресметката влегуваат и курсот на доларот, премијата и транспортните трошоци, акцизите, другите надоместоци и ДДВ.
Досегашното движење на јавно достапните котации за истиот медитерански пазар покажува пад во однос на минатата недела. Бензинот од 10 ppm на 21 и 22 септември се движеше околу 1.300 долари за тон, под просекот од околу 1.325 долари од претходната пресметковна недела. Кај дизелот падот е уште поизразен – котацијата на 21 септември изнесуваше околу 1.496 долари за тон, наспроти просек од околу 1.595 долари во периодот од 14 до 18 септември.
Овие котации добро го следат индексот што го користи РКЕ. За претходната недела нивната пресметка даваше раст од околу 0,96 проценти кај бензинот и 6,77 проценти кај дизелот – практично идентично со процентите што ги објави Регулаторната комисија при последната корекција.
Дел од падот на берзанските цени сепак го неутрализира посилниот долар. Средниот курс на американската валута во првите денови од оваа недела е за околу половина до еден процент повисок во однос на просекот од претходната пресметка.
Според сегашното движење, доколку до петок нема поголем пресврт на берзите, ЕУРОСУПЕР БС-95 би можел од сегашните 99 денари да се спушти на околу 98 до 98,50 денари, а БС-98 од 101 на околу 100 до 100,50 денари. Станува збор за проценка бидејќи во понеделничката пресметка ќе влезат и котациите од среда, четврток и петок.
Кај дизелот ситуацијата е поинаква. Повластената стапка на ДДВ од 10 проценти за гасните масла важи само до 24 часот на 28 септември. Ако Владата не донесе нова одлука за нејзино продолжување, од 29 септември повторно би се применувала редовната стапка од 18 проценти.
Во такво сценарио, падот на берзанската цена би ублажил дел од даночниот удар, но според сегашните котации дизелот сепак би можел од сегашните 104,50 денари да се искачи во зоната од приближно 107 до 108 денари за литар. Ако, пак, Владата го продолжи ДДВ-то од 10 проценти, берзанскиот пад отвора простор дизелот повторно да се спушти кон околу 100 денари за литар.
Конечната пресметка ќе зависи од котациите до крајот на неделата, курсот на доларот и пред сè од тоа дали привременото даночно олеснување за дизелот ќе продолжи и по 28 септември.