Премиерот Христијан Мицкоски оцени дека извештајот на Светска банка за растот и работните места претставува добра основа за реформите што Владата треба да ги продолжи и заврши.
На презентацијата на извештајот „Македонија: Излез од стапицата на среден доход“, Мицкоски посочи дека инфраструктурата останува меѓу главните приоритети на Владата. Тој истакна дека се забрзува реализацијата на Коридорите 8 и 10Д, а очекува следната година да биде пуштена во сообраќај и првата делница од Коридорот 10Д.
За автопатот Кичево–Охрид, Мицкоски најави дека делницата од Извор до Врбјани се очекува да биде пуштена до крајот на октомври, додека целосно функционален автопатот би требало да биде во првата половина од следната година.
Како важни инфраструктурни проекти ги посочи и патот Блаце–Скопје, делницата Букојчани–Кичево, како и железничката инфраструктура на Коридорот 8.
Во делот на енергетиката, премиерот рече дека домашното производство покрива меѓу 93 и 96 проценти од потребите, со очекување земјата следната година да достигне нето-нулта увозна зависност од електрична енергија.
Мицкоски најави и продолжување на изградбата на гасните интерконектори со Грција и северниот сосед, а се осврна и на потенцијалот на вештачката интелигенција и податочните центри за отворање високо платени работни места и привлекување инвестиции.