Поранешниот американски претседател Бил Клинтон и поранешната државна секретарка Хилари Клинтон одбија да сведочат во конгресната истрага за починатиот финансиер и осуден сексуален престапник Џефри Епстин, која ја водат републиканците во Претставничкиот дом. Двојката оценува дека истрагата е политички мотивирана и насочена кон партиски поени.
Во писмо испратено до републиканскиот пратеник Џејмс Комер, претседател на Комитетот за надзор, Клинтонови наведуваат дека „секој човек мора да одлучи кога му е доста“, додавајќи дека за нив „тој момент дојде сега“.
Комер реагираше со закана дека ќе побара Бил и Хилари Клинтон да бидат прогласени за виновни за непочитување на Конгресот доколку не се појават пред комитетот, што теоретски може да доведе и до кривични пријави.
Во писмото што Хилари Клинтон го објави на социјалните мрежи, двојката наведува дека веќе ги споделила сите „малку информации“ со кои располагале, со цел да помогнат во расветлување на случајот. Воедно, тие го обвинуваат Комер дека ја користи истрагата за да го одвлече вниманието од пропустите на администрацијата на поранешниот претседател Доналд Трамп.
„Тоа го направивме затоа што злосторствата на Епстин беа ужасни. Ако владата не направила сè што можела за да ги истражи и гони тие злосторства, од која било причина, тоа треба да биде фокусот на вашата работа“, наведуваат Клинтонови, додавајќи дека не гледаат докази оти комитетот се движи во таа насока.
Тие истакнуваат дека нема убедливо објаснување за постапките на Комер освен партиска политика и посочуваат дека очекуваат да бидат формално прогласени за виновни за непочитување на Конгресот.
Во меѓувреме, администрацијата на претседателот Доналд Трамп му наложи на Министерството за правда да ги објави досиејата поврзани со кривичните истраги за Џефри Епстин, во согласност со законот за транспарентност донесен од Конгресот. Епстин во минатото имал контакти и со Трамп и со семејството Клинтон.