Патот кој води кон Средно Водно се наоѓа под целосна градежна реконструкција со цел подобрување на безбедноста во сообраќајот и уредување на инфраструктурата. Градежните активности опфаќаат обнова на коловозот, но и решавање на долгогодишните проблеми со атмосферските води и заштитните огради.
Како што објави градоначалникот Орце Ѓорѓиевски, проектот се реализира со сериозен пристап и силна динамика бидејќи овој правец е клучна точка за илјадници граѓани.
„Водно е душата на Скопје. Место каде генерации скопјани пораснале, место каде се бара мирот по напорниот ден, каде семејствата го поминуваат слободното време. Токму затоа, со сериозен пристап и силна динамика, започнавме темелна реконструкција на патот кој води кон Средно Водно“, истакнува тој.
Покрај примарното асфалтирање на коловозот, градежните екипи на терен вршат и дополнителни зафати кои со децении биле запоставени од надлежните служби.
„Покрај реконструкцијата на коловозот, се уредуваат и сливниците за атмосферските води кои долги години беа нефункционални и неодржани, а се обновуваат и еластичните одбојни огради (банкини), кои исто така повеќе децении стојат оштетени и непроменети. Решаваме еден долгогодишен проблем и овозможуваме поголема безбедност, подобра заштита на патот и негово подолгорочно одржување“, соопштува Ѓорѓиевски.
Паралелно со патниот правец, најавено е и тековно одржување на пешачките зони и останатите придружни содржини на планината.
„Паралелно, во континуитет се одржуваат и патеките кон Водно, се уредува просторот и се заменува дотраената урбана опрема, за ова место повторно да го добие изгледот што го заслужува. Скопјани заслужуваат безбедни патишта, уредени јавни површини и Водно кое ќе биде вистинска гордост на градот“, се додава во објавата.
На крајот, упатен е и јавен апел до сите посетители на локалитетот за поголема еколошка свест и заштита на околината.
„Апелирам, да си го чуваме градот. Водно се белите дробови на Скопје и само со заеднички придонес ќе остане нашето најубаво место. Продолжуваме со работа“, завршува тој.