Во една скопска населба синоќа бил заловен волк, кој според првичните информации, бил незаконски чуван како домашно милениче. Животното било затекнато со ремче и ланец, по што веднаш биле известени надлежните служби.
Градоначалникот на Град Скопје, Орце Ѓорѓиевски, упати остра осуда за овој настан, нагласувајќи дека ваквото однесување ја загрозува безбедноста на сите граѓани.
„Вечерва во една скопска населба беше заловен волк, кој очигледно бил незаконски чуван (со ремче и ланец) како домашно милениче. За случајот веднаш беа известени сите надлежни институции.
Не можам да поверувам дека постојат толку несовесни поединци кои на ваков начин третираат диви животни, а притоа ја загрозуваат безбедноста на своите сограѓани. Ова не е само неодговорност, туку сериозна опасност за целата околина.
Волкот во моментов се згрижува од страна на службите на Скопската зоолошка градина, а институциите очекувам да ги преземат сите неопходни мерки и целосно да го расчистат случајот!
Во Скопје мора да има ред!
Мора да изградиме похумано, побезбедно и одговорно општество во кое законите важат за сите, а животните се третираат со грижа, а не како предмет за нечие иживување“, напиша Ѓорѓиевски во својата објава.