Ученици од ООУ „Лазо Трповски“ од Скопје освоија награда на Меѓународниот училиштен натпревар за воздушен и вселенски сообраќај 2026, кој традиционално се одржува во Берлин, Германија.
Од училиштето соопштуваат дека проектот „Нашето патување на Јупитер“ бил изработен од учениците од 4а одделение, под менторство и координација на наставниците Ирена Грегориќ и Стефан Симовски.
Конечната одлука за наградите на овој екипен меѓународен натпревар за ученици од трето и четврто одделение ја донело деветчлено стручно жири, составено од претставници на организаторот – Сојузното германско здружение за воздушна и вселенска индустрија од Берлин, универзитетски професори, наставници, германски владини претставници, пратеници, медиумски работници и претставници на концернот „Ербас“.
Натпреварот е организиран од Сојузното германско здружение за воздушна и вселенска индустрија во соработка со повеќе институции, меѓу кои Сојузното министерство за економија и енергија на Германија, Сојузната конференција за образование и истражување, „Луфтханза Техник“ и концернот „ЕАДС“, во чиј состав е и производителот на патнички авиони „Ербас“.