Од акционерското друштво ЕСМ најстрого ги отфрлија тврдењата за наводно доцнење на платите во компанијата, обвинувајќи одредени политички партии за ширење лажни наративи и обиди за саботажа на енергетскиот сектор со цел внесување немир меѓу вработените.
Од компанијата појаснуваат дека платата за вработените ќе биде исплатена во рамките на законскиот рок, а тековните административни усогласувања во системот настанале исклучиво поради едновремените барања од над 140 вработени за ажурирање и промена на нивните лични податоци. Ова, според ЕСМ, наметнало потреба од дополнително време за нивна техничка обработка и верификација до 6 ноември, сè со цел да се обезбеди сигурна и точна распределба на средствата.
Во реакцијата се нагласува дека работењето на АД ЕСМ во изминатите две години минува низ интензивен процес на финансиска и техничко-технолошка консолидација. Исто така, оттаму децидно посочуваат дека работењето на компанијата не треба да се поврзува со државниот буџет:
„Средствата за плати компанијата самостојно ги обезбедува без субвенции, за разлика од периодот 2021-2024 година“, велат од ЕСМ.
Од компанијата потсетуваат и на преземените чекори за подобрување на стандардот на вработените, истакнувајќи дека веќе е започнат процесот за зголемување на платите согласно неодамна потпишаниот Колективен договор со репрезентативните синдикати. Дополнително, на почетокот на јули бил исплатен регресот за годишен одмор за 2026 година во целосна вредност од 100%, а се потсетува и дека во изминатите две години декемвриската плата се исплаќа пред почетокот на новогодишните празници.