Возачите имаат уште неколку дена да ги подготват своите автомобили за зимските услови, бидејќи од 15 ноември започнува законската обврска за задолжително поседување зимска опрема во возилата. Правилото ќе важи до 15 март 2027 година, а непочитувањето може да донесе парична казна.
За патничките возила со тежина до 3.500 килограми, законот предвидува две можности за исполнување на обврската. Првата е користење зимски пневматици на сите четири тркала, со минимална длабочина на шарата од четири милиметри.
Втората можност е возење со летни пневматици, исто така со минимална длабочина на шарата од четири милиметри, но со задолжително поседување синџири за снег со соодветна големина.
За возачите кои нема да ја почитуваат обврската и нема да ја поседуваат пропишаната зимска опрема е предвидена глоба од 45 евра во денарска противвредност.
Со приближувањето на зимската сезона, се препорачува навремена проверка на пневматиците и задолжителната опрема, за возачите подготвени да ги дочекаат променливите временски услови и да избегнат непотребни санкции.