Компанијата „Рапид Билд“ ќе го проектира и изгради македонскиот дел од интерконективниот гасовод Македонија–Србија, инвестиција вредна 29,4 милиони евра. Договорот денеска го потпишаа директорот на АД „Номагас“, Недим Рама, и директорот на „Рапид Билд“, Тони Каранфиловски, во присуство на премиерот Христијан Мицкоски и министерката за енергетика Сања Божиновска.
Договорот е по принципот „клуч на рака“ и ги опфаќа урбанистичкото планирање, проектирањето, изградбата и обезбедувањето одобрение за употреба. Рокот за целосна реализација на проектот е четвртиот квартал од 2028 година.
Македонскиот дел од гасоводот ќе биде долг 22,4 километри и ќе има дијаметар од 500 милиметри. Ќе започнува кај блок-станицата „Клечовце“, а ќе завршува на границата со Србија, во близина на селото Сопот. Во рамките на проектот ќе бидат изградени и пет придружни објекти, меѓу кои мерна и редукциска станица, блок-станица и две приемно-отпремни чистачки станици.
Предвидениот технички капацитет на гасоводот е до 160.000 кубни метри гас на час, а системот ќе овозможува двонасочен проток.
Новиот интерконектор е дел од планот Македонија да стане транзитна точка за природен гас од југ кон Србија и понатаму кон Централна Европа. Земјава веќе го гради интерконекторот со Грција, преку кој домашниот систем треба да добие пристап до ЛНГ-терминалот во Александропулис. Оттаму, преку врската со Србија, гасот би можел да продолжи кон Унгарија, Австрија и други европски пазари.