Суд во американската сојузна држава Ново Мексико ѝ наложи на компанијата „Мета“ да плати казна од 25 милијарди долари поради доведување на корисниците во заблуда во врска со приватноста на Фејсбук. Одлуката е донесена во рамките на правната постапка која произлегува од големиот скандал со „Кембриџ аналитика“.
Судијата Френсис Метју го утврдил конечниот паричен износ откако претходно во септември поротата ја прогласи компанијата за одговорна за повеќе од 43 милиони прекршувања на државниот закон за заштита на потрошувачите. Станува збор за граѓанска парична казна во корист на сојузната држава, а не за директна исплата на отштета на секој поединечно засегнат корисник. Според известувањата на медиумите, ова е највисоката казна некогаш изречена против оваа компанија.
Во образложението, судијата оцени дека однесувањето на Фејсбук било систематско и се однесувало на суштината на неговите деловни практики. Иако законската пресметка овозможувала казна која надминувала 219 милијарди долари, судот сепак го намалил конечниот износ на 25 милијарди.
Државниот обвинител Раул Торез ја поздрави одлуката и ја оцени како силна порака до технолошките гиганти.
– Ова е силна порака до технолошките компании дека мора да одговараат за начинот на кој ги информираат граѓаните и постапуваат со нивните податоци – истакна Торез, додавајќи дека средствата од казната треба да бидат насочени кон јавното образование во Ново Мексико.
Правниот тим на „Мета“ ги оспорува доказите за претрпената штета и начинот на пресметување на прекршувањата, а во постапката бараше значително пониска казна од околу 3,4 милијарди долари. Компанијата претходно најави жалба на одлуката на поротата, што значи дека парите нема веднаш да бидат достапни, а конечниот исход ќе зависи од текот на жалбената постапка.
Случајот во основа потекнува од откритијата дека компанијата „Кембриџ аналитика“ добила неовластен пристап до лични податоци од милиони профили на Фејсбук без согласност на корисниците, кои потоа биле користени за политичко профилирање и насочено рекламирање, вклучително и за време на претседателските избори во САД во 2016 година.