Собраниската Комисија за финансирање и буџет денеска треба да ја продолжи расправата во второ читање за Предлог-ребалансот на Буџетот за 2026 година, за кој се поднесени над 200 амандмани. Расправата во матичната комисија е предвидено да трае вкупно 10 дена.
На првиот ден од расправата, министерката за финансии Гордана Димитриеска-Кочоска појасни дека промените не се прават поради проблеми со ликвидноста, туку за усогласување со новите економски текови.
„Ребалансот на буџетот за 2026 година не произлегува од недостигот на приходи или од нарушена ликвидност на буџетот, туку е резултат на потребата да се усогласат буџетските проекции со новите економски услови, да се обезбедат дополнителни средства за законските обврски што значат редовна исплата на платите во секторите во кои е обезбеден раст, повеќе средства за дополнителна поддршка за земјоделството, социјалната заштита и за општините, како и дополнителни средства за забрзување на инвестицискиот циклус“, истакна министерката Димитриеска-Кочоска.
Во однос на самата рамка на ребалансот, вкупните приходи се ревидираат на ниво од 379,5 милијарди денари. Притоа, даночните приходи остануваат речиси непроменети на 213,2 милијарди денари, неданочните приходи се зголемуваат за речиси две милијарди денари, додека кај донациите има раст од речиси 2,7 милијарди денари.
На расходната страна, вкупните расходи се проектирани на 425,8 милијарди денари. Обезбедени се повеќе пари за земјоделски субвенции (плус 1,4 милијарда денари, со што вкупно изнесуваат 8,7 милијарди денари), како и за железничкиот сообраќај, поддршка на спортот, студентскиот и ученичкиот стандард. Од друга страна, расходите за стоки и услуги се кратат за приближно 837 милиони денари и се пренасочуваат кон приоритетни потреби.
Посебен акцент се става на капиталните инвестиции кои се зголемуваат за 5,8 милијарди денари (или 14,5 отсто раст во однос на првичниот буџет) и достигнуваат речиси 46 милијарди денари. Поради ова, буџетскиот дефицит се ревидира на 46,3 милијарди денари или 4,1 отсто од БДП, што е зголемување за 0,6 процентни поени.
„Првпат корекцијата на дефицитот е резултат, пред сè, на повисоките капитални расходи и инвестициите во инфраструктурата, односно зборуваме за дефицит што ќе финансира развој. Средствата се насочени кон реализација на капитални проекти од стратешко значење за државата и граѓаните, што ќе остане принцип на работа на оваа Влада“, порача Димитриска-Кочоска.
Околу ваквите буџетски измени веќе се спротивставија ставовите во Собранието. Додека пратениците од власта посочија дека промените овозможуваат зајакнување на економијата и реализација на развојни проекти, опозицијата излезе со оценка дека со овој ребаланс воопшто не се адресираат клучните предизвици со кои се соочуваат граѓаните.