Вкупно осум пожари на отворен простор се регистрирани денеска на територијата на државата до 13:00 часот, од кои четири се сè уште активни, два се ставени под контрола, а два се целосно изгаснати, информираат од Центарот за управување со кризи (ЦУК).
Во Општина Студеничани пожарот се шири на потегот од селото Моране, преку Вртекица до Рамни Габер, каде што гори мешана шума.
Активен е и пожарот во Општина Македонски Брод, во месноста Видуш кај селата Драгов Дол и Локвица, каде што се зафатени ниска вегетација, нискостеблеста шума и грмушки.
Во Општина Прилеп гори во селото Чаниште, со краци насочени кон селата Крушевица, Лопатица, Орле и кон Црна Река, додека во Општина Охрид активен е пожарот на депонијата Буково.
Под контрола се поставени пожарите во Општина Јегуновце кај селото Копанце и на депонијата во Делчево.
Пожарникарите во текот на денот целосно ги изгаснаа пожарите во селото Рашче во Општина Сарај и на потегот Просениково–Сарај во Струмица.
Од ЦУК апелираат до граѓаните на особена внимателност при престој и движење на отворен простор, особено во услови на високи температури и зголемен ризик од ширење на пожари.