Премиерот Христијан Мицкоски вели дека Владата ќе продолжи со, како што ја нарече, пробизнис и проекономска политика, оценувајќи дека економските показатели покажуваат раст на економијата и пониска инфлација.
„И Европската комисија, и Меѓународниот монетарен фонд и Светска банка го потврдуваат тоа што ние како Влада го зборуваме, дека во регионот сме држава со највисока стапка на раст на бруто домашниот производ и со најниска стапка на инфлација“, изјави Мицкоски.
Тој посочи дека во вториот квартал од годинава економскиот раст изнесувал 4,3 проценти, додека инфлацијата, според него, се движи меѓу два и три проценти.
„Денеска гледаме дека имаме за 25 проценти пониска стапка на инфлација од онаа што е европскиот просек. А тоа е резултат на политиките на Владата“, рече Мицкоски.
Премиерот се осврна и на обврските за враќање и рефинансирање на претходно земени заеми, тврдејќи дека во следните две години станува збор за околу пет милијарди евра.
„За следната, 2027 година, треба да презапишеме или да вратиме заеми од минатото во вредност од 2,3 милијарди евра. Во 2028 година треба да презапишеме или да вратиме заеми од минатото од 2,7 милијарди евра. Значи, само за две години треба пет милијарди евра или да презапишеме или да вратиме“, рече Мицкоски.
Тој оцени дека Владата наследила тешка финансиска состојба, но најави продолжување на реформите.
„Тешко е, не е лесно. Не е идеално, не може сè да биде идеално, но многу е подобро од тоа што беше пред три или четири години. Убеден сум дека со оваа политика за три или четири години ќе биде многу подобро од тоа што е денес“, изјави премиерот.