Здравствените власти ги засилуваат контролите на можните резервоари на вирусот на западнонилска треска, со фокус врз дивите птици и живината во ризичните подрачја, информираше министерот за здравство Сашо Клековски.
Тој упати апел до граѓаните да пријават во Агенцијата за храна и ветеринарство доколку забележат угината дива птица, посебно гавран.
„Најчести резервоари на западнонилска треска се гавраните. Имаме апел за пасивно пријавување, односно сите граѓани кои ќе најдат мртва дива птица, гавран или која било друга птица, да ја пријават во Агенцијата за храна“, рече Клековски.
Клековски посочи дека досега е запленета една пријава од Гостивар, но лабораториските анализи кај птицата не покажале присуство на вирусот.
Во ризичните зони ќе се спроведува и засилен надзор над живината што слободно се движи во близина на каналите за наводнување.
Министерот потсети дека при претходниот поголем бран во 2019 година, од девет контролирани кокошки била утврдена една заразена во регионите кои и денес се сметаат за загрозени.
Покрај следењето на птиците, започната е и засилена ентомолошка контрола за присуството на комарци, чии резултати ќе диктираат понатамошни дезинсекции и превентивни мерки.