Под покровителство на Општина Илинден и оваа година ќе се одржи Меѓународниот фолклорен фестивал „Св. Троица“, традиционална културна манифестација која ги обединува љубителите на фолклорот, музиката и народната традиција.
Настанот ќе се одржи во Домот на култура „Илинден“ во населбата Илинден, со богата програма исполнета со музика и традиционални ора од повеќе земји.
Фестивалската програма започнува во 19:00 часот со свечено дефиле на учесниците, кое ќе тргне од ПООУ „Гоце Делчев“ и ќе продолжи кон Домот на култура „Илинден“. Свечениот концерт ќе започне во 20:00 часот во амфитеатарот на Домот на културата, каде публиката ќе има можност да проследи настапи на фолклорни групи од Македонија, Србија, Бугарија, Чиле и Босна и Херцеговина.
Од Општина Илинден ги покануваат граѓаните да бидат дел од оваа меѓународна културна вечер и да уживаат во богатството на традицијата и фолклорот.