Според истражувањето на Евростат од 2025 година за користење на информатичко-комуникациски технологии, повеќе од една третина (35,4%) од онлајн купувачите во ЕУ пријавиле проблеми при купување преку веб-страница или апликација. Во Македонија, 29,41% од е-купувачите се соочиле со вакви проблеми.
Највисокиот процент на потешкотии е забележан во Малта (64,0%), Холандија (57,9%) и Луксембург (51,4%), додека најниските се во Португалија (4,5%), Грција (10,6%) и Летонија (13,3%).
Најчест проблем кај е-купувачите е бавната испорака, за што се пожалиле речиси една петина од анкетираните (19,9%). Втор по честота е проблемот со веб-страницата која била тешка за користење или работела незадоволително (11,5%), додека трет е проблемот со неточни или оштетени стоки и услуги (10,4%).