Американскиот Центар за предвидување на вселенското време при NOAA издаде предупредување дека во петок, 9 октомври, Земјата може да биде погодена од умерена геомагнетна бура од категорија G2. Причината е силна соларна ерупција проследена со исфрлање на коронална маса (CME), која се движи во правец на нашата планета.
Сателитските опсерватории забележале дека исфрлениот материјал се шири во форма на таканаречен „halo CME“, патувајќи со брзина од неколку стотици километри во секунда. Главното влијание врз магнетното поле на Земјата се очекува во текот на утрешниот ден.
Иако нивото G2 се смета за умерено на скалата од G1 до G5, надлежните предупредуваат на можни технички предизвици:
При ваков настан можни се осцилации на напонот во електроенергетските системи, особено во северните географски региони. Може да има и зголемено влијание врз трансформаторите.
Дополнително, можни се зголемен атмосферски отпор кај сателитите во ниска орбита, како и краткотрајни пречки во високофреквентните радиокомуникации и намалена точност на ГПС сигналите во поларните области.
Од научните служби нагласуваат дека бурата не претставува опасност за населението поради заштитата што ја обезбедува земјината атмосфера. Еден од атрактивните ефекти ќе биде поларната светлина, која во петок вечер ќе биде видлива низ Скандинавија, северниот дел на Велика Британија и САД, додека за нејзино појавување над Балканот или Македонија вообичаено е потребна многу посилна бура од категорија G4 или G5. Сепак, научниците остануваат во подготвеност доколку поволната ориентација на соларниот бран привремено го зголеми интензитетот.