Повеќе од 60 рудари од рудникот „Трепча“ останаа заробени под земја во среда вечерта, откако настана сериозен дефект во електричната инсталација.
Според информациите од шефот на Синдикатот на рударите, Ибрахим Јанузи, станува збор за 63 работници од втората смена кои останале заробени во првиот тунел. За загрижувачката ситуација тој изјави за KOHA:
„Поради дефект на електричната мрежа, околу 60-63 рудари од втората смена се заробени.“
Јанузи додаде дека интензивно се работи на нивно безбедно извлекување. Во меѓурмене, министерката за економија, Артана Ризваноли, изјави дека рударите се во добра здравствена состојба и дека се преземаат чекори за нивна евакуација:
„Рударите кои се наоѓаат во рудникот по дефектот на електричната опрема се во добра состојба. Тие се дел од втората смена, која завршува во 23:00 часот.“
Ризваноли информираше дека се организира постепен излез на рударите преку итен излез, додека на терен се присутни и дежурни екипи на полицијата и брзата помош.