Вознемиреност владее во близина на минхенскиот аеродром откако во заштитено подрачје во Баварија е забележана голема дива мачка за која стручните лица се сомневаат дека би можела да биде пума. Животното било забележано во текот на ноќта меѓу вторник и среда во заштитеното подрачје Ноцингермоос, во општината Обердинг, на само неколку километри од аеродромот.
Портпаролката на окружната управа Ердинг ја потврди информацијата за првичните проценки:
„Според првата стручна проценка, би можело да се работи за пума.“
Според информациите на „Билд“, постои веродостојна фотографија направена со камера за следење диви животни, а случајот го пријавил ловец. Надлежните засега немаат информации за потеклото на животното ниту пак за присуство на циркус во околината. Поради можноста да се работи за пума, властите ги повикаа граѓаните на максимална претпазливост – се препорачува децата да бидат надвор само под надзор на возрасни, а кучињата да се држат на поводник.